韓國女團少女時代（少時）28歲成員孝淵近期專攻綜藝節目，近日拍攝新節目《我的英文青春期》，節目中一眾成員每星期要一齊學習英文兩至三次，以紀錄眾人克服學習英文嘅種種為主題。
而出道十年、不時出國演出嘅孝淵，就被節目組踢爆英文水平嚇親導演。前日《我的英文青春期》舉行製作發佈會，節目導演透露邀請孝淵演出節目嘅原因，表示：「孝淵係全球知名明星，因此我以為佢英文好好，我身邊更有好多人以為佢係韓僑。但我問佢識唔識串school同chicken之後，佢竟然唔識串chicken！」另外，導演又指節目另一成員輝星同樣唔識串chicken。唔知孝淵拍攝完《我的英文青春期》後，英文會唔會突飛猛進？