隔牆有耳：首個自助圖書站西灣河插旗 - 李八方

「無肉令人瘦，無竹令人俗」，位於西灣河電影資料館旁、全港首個自助圖書站，正係以竹為設計概念，除咗採納自然光，仲配合自動化嘅借還書機，現代文人雅士可以24小時借還圖書及領取已預約嘅圖書館資料，自助圖書站噚日正式投入服務。

300本書供借閱

由於西灣河冇圖書館，唔少居民都大讚自助圖書站方便。圖書館總館長（營運及電腦）李子俊話，自助圖書站大約有300本書，中英文書比例係65：35，涵蓋小說、科學同體育等種類，頭三個星期會安排服務大使到場協助，但僅限下午12時至2時、下午3時至晚上8時嘅繁忙時段。
自助圖書站試驗計劃開支預算為780萬，用嚟買3部自助圖書機同軟件；而3部圖書機全年運作開支為480萬，另外兩部圖書機將設於尖沙嘴及大圍，預計明年有得用。