邵音音早前自爆喺十多歲時患皮膚癌，噚日佢同黃文慧、林俊賢囡囡林鈺洧等喺觀塘拍攝奇妙電視《使乜驚大兩Gen》，劇組順便為23歲生日嘅林鈺洧慶祝。音音姐講到自己嘅健康問題：「總之要死嗰陣實知，生命就係咁，要珍惜。每日收到好多介紹醫生嘅電話，搞到唔敢聽。佢哋係咪真係關心我呢？又唔係，日夜都要重複病情。個個人都有終點，心態好緊要。你知早過其他人去，會覺得活着係好幸福。」
醫生要簽紙生仔
音音姐話聽日會送好友陳自強最後一程，將骨灰撒落海，又講到自己將來身後事：「燒咗去，掟落海。」當年患皮膚癌，佢堅持生大仔：「86年喺美國生仔，醫生話我皮膚癌發作，冇辦法控制，要我簽紙，如果堅持生，死咗同佢哋無關，我都願意。」之後佢掀起衫領：「我條頸有少少黑色，係皮膚癌，慢慢會變大，所以要割。有段時間我個頭歪住行，醫生話我從此個頭會歪咗，入面生咗幾萬粒好似黑痣咁嘅嘢，要花幾個鐘頭去挑。」音音姐話個病冇藥食，唔曬得太陽，唔好刺激皮膚。
撰文：馮仁昭
