前高官孫明揚噚日接受民主黨劉慧卿嘅網台節目訪問，孫公依然好精神，遊花園嘅功力亦絲毫無減。孫公做官多年，政制、教育、房屋、土地呢幾項棘手政策都涉獵過，佢覺得現屆政府一地兩檢做嘅宣傳係唯一一次做得好嘅。
孫公嘅遊花園神功並唔係浪得虛名，記者問佢現屆政府係咪為23條立法嘅合適時間，佢話幾時都合適，事關佢唔信邪嘅，然後就講番舊時，話港府唔識做宣傳，唯一做得好就係最近嘅一地兩檢，因為一開波，政府就開盡機器，推銷高鐵優點，再加上今屆政府整個團隊有溝通，唔會一個官講呢樣、另一個官講第二樣。就係咁，23條立法嘅問題就俾孫公耍走咗。但問到立法會補選日子係咪要遷就北京兩會時，孫公就直截了當咁話：「點解要考慮？關你（人大、政協）乜事？」