全新旅遊專頁,即like籽想旅行:https://fb.com/travel.appleseed
這邊廂香港站Formula E啱啱跑完,那邊廂再早些少今屆F1都已經完滿結束,雖然上月底最後一站在阿布札比舉行的比賽完全不影響冠軍誰屬,不過都有個好大的talking point,因為F1賽會在這場賽事中公佈了全新的logo。
新logo的設計非常簡單,大會話用新logo代表F1進入了另一個時代,而個設計就象徵了現今F1戰車的形象,加上簡約設計有利於在電子平台上使用,不過似乎少點想像力都好難聯想到似部F1賽車。
而此logo一出,車迷反應都是彈多過讚,有人覺得舊logo有心思好多,中間隱藏的「1」字和右邊有速度感的紅色旗幟都好有代表性,亦有網民不滿「無啦啦點解要換logo?」就連今年剛剛成為四屆F1冠軍的咸美頓(Lewis Hamilton)都開口話「舊設計好經典,新標誌就不及了。」另一位四屆冠軍、效力法拉利車隊的維度爾(Sebastian Vettel)亦都話比較喜歡舊logo。其實上一代F1 logo已經沿用了廿幾年,在90年代由掌管F1多年的話事人Bernie Ecclestone發表,對於睇冼拿、普魯斯、舒密加長大的車迷來說,的確已經入晒腦,如今新logo出現,你又接唔接受到?
撰文:Dolly Lam