意甲兩支米蘭球隊，喺周日真係一天一地。AC由新帥加度素領軍，第一場波作客出戰賽前14戰全敗嘅「升班馬」賓尼雲圖，以為必響頭炮，點知兩度領先下都贏唔到，到補時仲衰到畀對手門將艾拔圖碧洛尼頂入扳平2:2，拎到佢哋歷史性頂級聯賽第一分，加度素話寧願自己被插一刀都好過輸呢一球。
同加度素似乎空有熱情比，今季接手教國際米蘭嘅史巴列堤就真係有功架喇。國米今季脫胎換骨，喺周日主場5:0大破基爾禾，繼續不敗兼且自上年一月以嚟首次升上意甲榜首，難怪成班球員賽後都大讚史巴列堤領導有方。翼鋒比列錫今場連中三元，而入一球嘅前鋒莫路伊卡迪，喺國米歷來累積入94球，躋身球會前10位置認真勁。