練馬師徐雨石肯定係現役本港泥地王，須知他今日（3日）四勝泥地賽，包括以冷馬「藍天堡馬」跟意大利好手李寶利攜手攻下第九場二班泥地1200米，從而完成個人近兩年內首次一日四捷。「藍天堡馬」單Win及組合獨贏A3分別派214.5及25.5元。
六歲馬「藍天堡馬」天生愛泥，季內原本跑四場都在田草輸到十名以外，這天一跑番泥地即變另一駒，縱使沿途近乎包尾，但於直路卻狂追十幾個馬位，及時趕過原本走甩咗勝出在望的祈普敦座騎「喜悅繽紛」，最後一步僅僅影相險勝鼻位，即近乎即一條線的距離，成功幫徐雨石埋齋四喜臨門，佢可謂出盡風頭。
徐雨石這天四匹頭馬順序是「天賜寶」（梁家俊）、「豹子頭」（何澤堯）、「勇冠多」（巫顯東）及「藍天堡馬」（李寶利），呢口徐廐自製四Win過關冷到30,666倍，有幸買中十蚊已經收30萬，相當誇張！
講番李寶利同徐雨石合作，早於9月3日開鑼日齊贏次熱「蒙古王」，事隔剛好三個月，這天憑冷門「藍天堡馬」再續前緣，馬主藍國恩的「藍天」系陣營，從中亦敲響今季勝鼓。
第九場二至四名分別為「喜悅繽紛」、「經典帝國」及「真先生」，四重彩派27萬幾。