本港恐襲風險相對低，但港人經常去旅行，恐襲唔係遙不可及。醫專災難防護應變教研中心早排整咗段針對演唱會嘅防災動畫，歌曲《排隊》嘅歌詞就用輕鬆手法提醒大家，要將自身安全放係首位，「走得摩，冇鼻哥，咪仲掛住拍片」。中心總監林楚釗話，同亞博等場地傾緊合作，喺觀眾排隊入場嘅位置播放呢條動畫，等市民認識一旦遇到恐襲點樣保護自己。
《全球恐怖主義指數報告》顯示，舊年針對平民嘅恐襲增加17%，林楚釗認為港人應居安思危，改善應變技巧，例如年初港鐵縱火案，唔少人留喺現場拍片，又有人用衣衫拍打傷者「滅火」，都係反面例子。
動畫同多媒體製作公司NEARKO、網絡歌手Olga Chung合作，角色用食物同《西遊記》為藍本，「酸悟空」懂得應變，進場時留意緊急出口位置，遇事又盡快撤離，所以冇受傷，但只顧打卡嘅「砂悟淨」就變成爆炸頭，睇片可到： https://www.youtube.com/watch?v=En7ZeQs0xqg 。