今季跑到目前為止，贏得最輕鬆，姿態最恐怖的頭馬，毫無疑問就是今午（3日）沙田第七場三班1000米直路賽，蔡約翰馬房，其澳洲鄉里騎師潘頓所贏的灰馬「旺蝦王」，基本上比行過對手更誇張，似係外星來的怪獸，「旺蝦王」保持不敗，蔡約翰則連續第五次賽事贏馬冇斷纜。
跟一代馬王「靚蝦王」同主，由資深馬主劉錫康持有，年僅三歲的「旺蝦王」，連同今仗已累積四戰全勝直路賽，亦成為繼「五十五十」及「平湖之星」後，另一匹具王者風範的灰色神獸，呢次單Win及組合獨贏A1同樣派14元。
「旺蝦王」以往贏馬姿態都好輕鬆，今場卻特別輕鬆，出閘後冇耐已經沿住外欄透出，史卓豐策「鞍歌」刻意上前鬥燒，真是不知天高地厚，「旺蝦王」從容應對，冇耐「鞍歌」已頂唔住「旺蝦王」的速度，自動腳軟墮退。
此時潘頓仍撳住韁繩，完全冇催策「旺蝦王」，後面馬群已食晒塵，此駒如自己同自己跑般，散步下贏2.25馬位，3歲馬負130重磅，無風無浪地保持出賽不敗，擺明具級際賽質素。賽後亦一如以往，馬主劉錫康如女兒劉津津高高興興地拉頭馬。
第七場只兩駒閘前着燈落飛，其中「醒蹄飛」後追第二，「綫路神駒」以第三名衝線，第四名由大冷馬「閃耀駿駒」拎到，四重彩派9,522元。