呢排大家最關注嘅數字梗係3.11，皆因明年此日立法會九龍西、新界東、港島區3區直選同建測界功能組別進行補選，4席花落誰家，影響分組點票權。點知3.11同全國人大政協兩會撞期，換言之人大政協要請假返港投票或助選，連日都有唔少建制派出聲話「上面嘅人」唔高興，噚日輪到民建聯創黨主席曾鈺成出招，話選管會要解釋，身為選管會主席嘅馮驊真係躺着也中槍！
曾：要考慮國家大事
日前民建聯主席李慧琼回應時已經話，國內城市舉行重要活動一般都會考慮兩會日子，選管會考慮3.11補選時冇此考慮，可見部份人對國家政治傳統認識不足。八方之前都講過，唔少建制派向北京篤背脊兼爭取改期，但最終特首林鄭月娥撐得住，維持選管會作嘅獨立決定，以免兩制名存實亡。
噚日林鄭啟程外訪時亦被問到3.11爭議，佢承認撞正兩會「係比較冇咁方便」，但重申選管會係獨立法定機構，按法例盡快進行補選，所以特區政府由頭到尾都好尊重佢哋嘅補選日子決定。由頭到尾？政務司司長張建宗日前話過就考慮其他補選日子「努力過」噃，林鄭對此只稱：「我諗你要去問張司長（努力過嘅意思）。」
曾鈺成噚日就話，3.11同兩會撞期對建制派選情影響唔大，人大同政協都可以考慮請假返港投票，但如果選舉日期可以遷就兩會就更理想，希望選管會交代點解堅持3.11，認為選管會作獨立決定時都要考慮一系列因素，尤其兩會係國家大事，好多香港選民要以人大、政協身份出席喎。
李八方