多間本地網媒合辦網絡媒體高𥧌會2017，大會以網上投票同評審團評分，頒獎畀一班致力推動社會議題嘅網民。年度網絡公民獎由一班律師同法律工作者組成嘅「法夢 Law Day Dream」奪得。佢哋facebook專頁成立咗一年多啲，獲6千幾個讚好，成員之一Vannie笑言「法夢」本來有自嘲意味，意思係「法治？發夢啦」，成立契機源於DQ立法會議員案同人大釋法等案件引起社會就唔同法律觀點嘅激烈討論，好似釋法追溯力同選民投票權等角力，希望透過專頁加強市民對法律認知。
法夢共有12名成員，包括律師、法律學者等，另一名成員Charles話文章以唔開名、唔出樣形式發佈，因為律師多少有避忌同限制，唔可以遠離專業形象，「唔想戴太多頭盔，希望討論落地啲」。法夢雖然係法律界KOL，但至今堅拒任何廣告邀約，「唔想花心力喺呢啲嘢，寫好啲文仲好」。