勞工及福利局局長羅致光早前進行任內首度北京訪問，佢噚日喺網誌分享訪京見聞，似乎此行感受甚深。佢話香港同中國同樣面對未來人口高齡化、總勞動力收縮以及未能估計嘅科技發展問題，而中國對勞工人口需求嘅分析同策略不但具啟發性，仲有助佢思考未來勞動巿場需求可能出現嘅變化，並做好策略性準備。
佢又提到對汽車機械頗有興趣，年輕時「捐車底」學過一啲汽車維修技巧，所以參觀北京市工業技師學院時，特別留意汽車實訓中心學員嘅學習情況，留意到唔少外國車廠都願意同學院合作，令學員有機會接觸唔同品牌嘅最新型號汽車，認為香港雖然都有唔少機械維修職業訓練課程，但規模大相逕庭，指香港年輕人如果能夠「近水樓台」，到國家級嘅培訓機構學習，將對佢哋大有裨益喎。