西甲班霸皇家馬德里上周六作客悶和畢爾包0:0，因鼻骨骨折而休戰兩星期嘅隊長沙治奧拉莫斯，今仗戴住保護面罩出場，雖然帶傷上陣但依然冇收火，到比賽最後四分鐘仲兩黃一紅被逐。連埋呢張紅牌，拉莫斯喺西甲已經累積拎咗19面紅牌，獨佔西甲歷史紅牌王寶座！
獨佔西甲領紅紀錄
睇番西甲嘅數據，攞紅牌第二多嘅，分別係已經退咗役嘅前桑坦德後衞柏保路艾法路同埋前薩拉戈薩後衞阿古亞度，佢哋分別都累咗拎咗18張紅牌，但呢個唔光彩嘅紀錄就俾拉莫斯嘅19面超越。計埋其他比賽，31歲嘅拉莫斯成個職業生涯已經拎咗24面紅牌，遠超皇馬隊史拎紅牌第二多嘅希亞路（12面）成倍咁多。拉莫斯其餘五面紅牌，有三面嚟自歐聯比賽，另外喺西班牙盃亦拎咗兩面。
講番場比賽，皇馬早喺開賽七分鐘已有機會打開紀錄，但賓施馬射門中柱唔入。而兩隊今場互有攻守，皇馬門將基羅拿華斯上半場有兩次重要撲救，換邊後皇馬亦有C朗射門中柱，延續佢今季聯賽冇入波運嘅頹勢；加上畢爾包門將阿列沙巴拿加兩度救出馬些路嘅射門，兩無隊最終互交白卷。皇馬和波後14戰得28分，錯過拉近同榜首巴塞隆拿距離嘅機會。後者喺同日西甲一樣和波失分，兩隊繼續保持八分距離。
球證誤判 巴塞都和
巴塞主場迎戰切爾達意外被逼和2:2，連續兩場聯賽失分。巴塞喺上半場20分鐘先失守，被前鋒伊亞高艾斯巴斯先開紀錄。美斯喺兩分鐘後火速追平，之後蘇亞雷斯喺24分鐘嘅單刀入波，但被誤判為越位，令巴塞錯失反先嘅機會。兩隊喺下半場再各入一球，2:2打和收場。
其實巴塞上周一作客賽和華倫西亞1:1嘅西甲賽事入面，美斯喺上半場嘅一記射門，皮球雖然已經過咗白界，但球證最終判入球無效。今次又再俾球證連累失分，巴塞教練華維迪覺得好沮喪，因為蘇亞雷斯嘅努力付諸流水：「我希望下一場球證唔好再出錯，呢啲事已經唔係第一次發生！」