練馬師新人王羅富全近排枕住有慶功宴，話明食完要贏多啲馬，果然今午（3日）於沙田馬場增添勝仗，佢憑「喜之星」與年輕騎師史卓豐，聯手攻下第四場五班泥地1800米，馬房累積24場頭馬繼續領先成績表。
由日本馬主內藤喜文持有的六歲馬「喜之星」，上次史卓豐走位平平熱倒，今次他將功補過贏馬，「喜之星」亦打破過去9戰泥地賽全落第的大盲門數據，今場單Win及組合獨贏A2分別派50.5及20.5元。
羅富全早排被西報稱為新一代五班王，寓意佢專贏五班賽，今勻「喜之星」幫佢進一步擦亮呢個新招牌。此駒克服13檔一早切入，沿途守前列位置，直路加速大勝2.5馬位。
史卓豐的父親史科菲及媽媽已到香港，為兒子打氣之餘，史科菲下周日將跑國際賽，今日「喜之星」贏馬後，史科菲一家三口和史卓豐女友Hannah來張合照，非常難得。
「喜之星」來港前曾勝1200米三級賽，又於1400米一級賽馬拉華度種馬錦標跑第三，插班評85分之高，但此駒在港先苦後甜，上手由已散倉的吳定強訓練，逢出例輸，直插水到五班，今季投向羅富全卻長跑長有，季內在羅廐暫時四戰兩冠一殿，羅富全對馬主可謂交足功課。
第四場前四名有熱有冷，亞至殿軍依次為「勁伶利」、「百威特務」及「通勝」，四重彩派二萬一千幾。