民主派初選如箭在弦，唔同參選人都積極招兵買馬，組織競選團隊。有傳學聯秘書長李軒朗（圖）為支持參選人之一、中大學生會前會長張秀賢，決定辭任秘書長一職，最終要交由學聯常委會決定。八方問過張秀賢知唔知情，佢不置可否，但未有否認。
李軒朗就發聲明，承認獲邀加入其中一名新界東參選人嘅競選團隊，為免外界誤以為學聯支持某人，決定辭任秘書長，如果請辭獲學聯常委會接納，佢就會正式加入有關競選團隊。
學界中人對於李軒朗突然辭職似乎有不滿，有人話未完成任期就辭職助選係不負責任，但亦有人指李當日力挺張秀賢加入學聯成立嘅在囚抗爭者支援基金，可見二人相交匪淺，為張助選係意料中事。