位於倫敦嘅阿仙奴，係英國其中一間長壽嘅球會，喺1886年成立，即係131年前。熟悉阿仙奴嘅球迷都會知道呢隊波有另一個名叫做兵工廠，咁呢個名又係點嚟㗎呢？
其實阿仙奴嘅第一個會徽係創會後兩年先至出現嘅，查實球隊當時個名仲係叫皇家兵工廠，球隊嘅第一個會徽基本上係抄人哋嘅，對象就係Woolwich呢個自治區嘅徽章，因為皇家兵工廠由創會至1913年都係喺呢個地方踢波嘅。
大炮一直以嚟都係阿仙奴會徽嘅最重要元素，喺第一代會徽仲有三支咁多添，因為Woolwich呢個地方有好深厚嘅軍事歷史，咁多年嚟都係靠大炮保護自己嘅地方。雖然阿仙奴之後同Woolwich已經再無任何關係，不過會徽上面嘅大炮都擺咗咁多年，所以就一直沿用至今。阿仙奴喺1913年搬去北邊嘅高貝利，喺1922到1925年阿仙奴嘅會徽只係得番一支指向東邊嘅大炮，之後有一段好長嘅時間大炮嘅方向就調番轉，一路向西。
阿仙奴嘅會徽之後加入咗一句拉丁文，翻譯成英文係「勝利，來自和諧嘅環境」。阿仙奴嘅會徽喺之後超過50年都無乜大變，直至2002年阿仙奴再將會徽改成依家呢個款式，大炮指嘅方向變返向東，就算2006年主場搬咗去阿聯酋球場都係沿用呢個會徽。