周日（3日）沙田賽事，練馬師何良有一駒交予郭能執韁，就是第一場五班1200米泥地賽的「做得好」，排1檔負126磅出賽。
「做得好」可以話有晒搏殺手影，事關今朝(2日)晨課期間，何良特意在烽火台捉住郭能，指手畫腳向他講解「做得好」的脾性，並雙雙研究陣上戰略，只見兩人神情輕鬆笑晒口，郭能其後更豎起大拇指，向記者擺pose影相，似在大讚這匹戰馬有良好機會。
「做得好」至今雖未上過名，但今季踏入4歲後，跑過兩場1400米都展現過上佳前速，今仗初跑泥地，縮程角逐利放的1200米，正好讓此駒的速度大派用場。最近此駒由郭能過檔試泥地大閘，刻意在後跟跑示人以弱，掩藏泥地性能。但其實早在9月初另一課泥地大閘，「做得好」一放到底走勢強勁，所以今次初跑泥地賽，絕非無的放矢，加上抽1檔，更不可睇低。