意大利貴為四屆世界盃冠軍，意國人民對足球有種情義結，沈拿亦不例外。
這位意甲班霸祖雲達斯粉絲抵港後，亦提到愛隊在香港時間周六（2日）凌晨作客大戰榜首的拿玻里；後者正好是李寶利的愛隊，即使沈拿跟李寶利是死黨，惟賽前賽後也難免會針鋒相對。
沈拿說：「我鍾意祖雲達斯嘅管理模式同起用球員嘅策略，風格簡單直接，唔會玩花巧嘢。我家鄉Sassari距離祖雲達斯主場約600公里，要入場睇波就要揸幾個鐘頭車。雖然係咁，但每次我返到意大利，都會盡可能入場睇波。講到最鍾意嘅球員，心目中只有一個人，佢就係派路，佢簡直係一個天才嘅中場球員！」
意國無緣出線明年的世界盃決賽周，震撼全球體壇，全球各地球迷都有各自意見，沈拿亦有自己的看法。
「意大利56年嚟首次入唔到決賽周，等同兜巴星咗意國球壇一下，呢一巴力度非常重。我見到現時好多年輕球員，腳法同體力真係唔及上一代。究竟係唔係青訓出咗問題，需要認真檢討。」
沈拿跟許多意大利人一樣熱愛足球，不過他自嘲球技連丙組也不如，自己最喜歡的運動仍是賽馬，亦會勤力練跑，每個月平均跑200公里，但目的並不是自娛，而且為了造磅和強身健體，他笑言如果不跑步，體重在一個月內便會急升20磅，屆時便要被逼轉行。