曾經三次屈居日聯亞軍嘅川崎前鋒終於唔使做阿二。上周六上演今季日聯最終回，川崎前鋒喺主場5:0大破大宮松鼠，後上力壓鹿島鹿角封王。
前鋒曾經喺06、08同09年三次做亞軍，到今季煞科戰前，佢哋仲落後榜首鹿角兩分，要後上奪冠條件好簡單，就係贏松鼠加埋鹿角作客磐田山葉失利，結果求仁得仁。
前鋒開波分幾鐘已經由阿部浩之先開紀錄，之後前鋒小林悠發威，完半場前入波，到易邊後再入兩球完成「帽子戲法」，加埋長谷川龍也喺補時再入一球，前鋒主場5:0大勝。小林悠亦以23球力壓杉本健勇贏得神射手。
鹿角作客山葉就攻極唔入，前鋒韋法臣李安度同金崎夢生都先後浪費黃金機會，結果雙方冇入球出現，0:0和局收場，結果同分後得失球較差，鹿角宣告衞冕失敗。