意甲球隊烏甸尼斯禮拜四晚喺意大利盃第4圈大炒越級挑戰嘅意乙球隊佩魯賈，躋身最後16強會鬥拿玻里。
主隊今場喺17分鐘由丹尼路拿蘭基拉先開紀錄，踢到34分鐘再有麥斯盧比斯射入12碼領先至2:0。呢位阿根廷前鋒就係之前踢過AC米蘭、森多利亞同巴塞隆拿等球隊，仲贏過兩屆西甲同一次歐聯果位，真係恨死隔離。烏甸尼斯喺40分鐘由拿沙格拿射成3:0，但係佩魯賈喺完半場前射入12碼破蛋，半場落後1:3。
講開佩魯賈，大家最有印象可能係當年日本國腳中田英壽踢過呢隊波兩季。麥斯盧比斯喺下半場踢咗四分鐘幫主隊領先到4:2之後，佩魯賈突然連追兩粒變成只係落後3:4。不過，呢一切都係虛火，麥斯盧比斯喺63同71分鐘再入兩粒完成大四喜，加上瑞典中場恩祖臣，同埋捷克嘅積及贊圖各入一粒，烏甸尼斯最後以8:3大炒佩魯賈晉級。之但係呢個咁誇張嘅「主其他」波膽，足智彩嘅賠率其實都只係得30倍咋！