10月尾喺南非基維爾馬場，有一單引起全球馬壇關注嘅2800米平地賽事出現。當時焦點馬匹Run Rhino Run，夥拍見習生Serino Moodley途中一度拋甩馬群超過200米，最終大勝21個馬位而回。
相隔約一個月後，呢匹「犀牛」主角在剛周日（26日）現身南非特夫方丹馬場，出戰一場3000米表列平地賽事，不過拍擋就唔再係一鳴驚人嘅牌仔，而係換上大師傅Warren Kennedy，但陣上依然沿用上一次大逃戰術，放頭狂放搏走甩贏馬，但效果同上次南轅北轍，因為今仗嘅其他騎師終於冇再發夢。
進入最後一個彎位前，其他馬匹已開始發力跟上帶頭嘅Run Rhino Run。轉入直路前，Run Rhino Run經已被馬群完全超越，之後更越騎越冇力，最終大敗接近100個馬位。呢匹「犀牛」如神話般嘅故事，終隨今次大敗而落幕。