谷草王即是谷草王！練馬師方嘉柏這晚（29日）一發威即連中三元，佢於第三、四場連勝「進綵」及「喜盈盈」包辦孖寶後，又在第五場四班1200米憑潘頓策騎的「喜進」建功，馬房大演帽子戲法，威震快活谷。「喜進」單Win及組合獨贏A1分別派35及16元。
四歲馬「喜進」以往四戰最叻一次第三，今仗排4檔好位即有突破，沿途咬住放頭馬守貼欄第二位好形勢下，直路一增速即拋離所有對手直奔終點，潘頓收韁仍贏2.5馬位返嚟，個人累積連勝三次夜馬冇斷纜，暫時有31Win維持落後領先的莫雷拉五Win排第二。
方嘉柏表示「喜進」是一匹很好的質新馬，上季仍未成熟，但速度上乘，早知有不俗的質素，五月時發生有一件事情令他很震驚，因為「喜進」照鼻氣管向來冇事，但有朝試閘後馬兒兩個鼻孔有血，影響了進度，幸好今季馬兒健康回復穩定冒勇，希望未來繼續有頭馬見面。
講番方嘉柏，這晚他已有三駒報捷，由唔同騎師勝出，分別為「進綵」莫雷拉、「喜盈盈」何澤堯及「喜進」潘頓，反映佢調兵遣將充滿靈活性。
第五場前四名冷熱參半，次熱「喜進」跑第一，冷門「天皇巨星」及「大地和平」分獲亞、季軍，大熱「金飯碗」則跑梗頸四，四重彩派三萬二千幾。