恭喜恭喜，警隊有喜！警方喺facebook發佈喜訊，原來「警犬媽媽」Arwen喺27日，生咗11隻非常精靈可愛嘅警犬BB（圖），11隻喎，足足係一隊足球隊，難怪唔少網民話，警犬又有一批活力生力軍！瑪蓮萊犬Arwen其實早喺2015年，已經好事成雙生過一男一女兩隻幼犬，今次再做媽媽，估唔到一生就11隻，果然好生養。
警犬其實主要分做四大狗種，除咗瑪蓮萊犬，仲有德國牧羊犬（狼狗）、史賓格獵犬同拉布拉多犬，平日主要負責巡邏、追蹤、搜毒同爆炸品等工作。近年警犬面對「退休潮」，警方都以外購同自家繁殖等方法輸入新血，今次Arwen帶嚟大批新血，仲唔係立下大功？