練馬師方嘉柏素來有谷草王之稱，偏偏近排死晒火，谷戰剛好一個月冇贏，就算沙田成績亦唔見得有幾好。
所謂否極泰來，方嘉柏今晚（29日）谷戰起用莫雷拉，於第三場四班2200米勝出半冷「進綵」，令自己重開谷草勝門。由女馬主王錦汶持有的「進綵」跨季五戰得三冠一亞，表現大熟大勇。今場單Win及組合獨贏A2分別派79.5及24元。
「進綵」本來由潘頓騎開，今鋪佢唔跑，轉策質素較新的蘇保羅馬房「金如意」，而「進綵」改由同級騎師雷神操刀，沿途「進綵」留後守八九位走勢暢順，直路初原本於內叠陷於劣勢，惟雷神不慌不忙，操控座騎逐步追趕，卒之「進綵」、「金如意」平排衝線看似平頭，經影相後「進綵」險勝「金如意」鼻位，「進綵」就此錄得季內第二捷。
方嘉柏賽後以廣東話說啱啱好，他說「進綵」在終點前力壓對手，真是好運，他又說近期馬房搏殺手風欠順，日前他特意去拜神，果然成功轉運。方嘉柏又謂「進綵」今仗初戴開縫眼罩，馬兒跑來更醒神，此馬已累積贏了四Win，非常不錯。
反觀「金如意」功敗垂成輸少少做阿二，未能打破在港出賽齋缽，唔知賽後潘頓有冇怨自己揀錯馬呢？同場三、四名分別為「康樂神駒」及「其樂無窮」，四重彩派一萬二千幾。