建制派就立法會補選爭位醞釀多時，新民黨主席葉劉淑儀噚日宣佈該黨最近完成咗選拔程序，屬意由該黨南區區議員陳家珮（Judy）出戰港島補選，仲話最近已經開始訓練Judy嘅口才同對政策嘅熟悉度，並正爭取其他建制黨派支持Judy披甲！
葉太話喎，民建聯主席李慧琼同工聯會中人對Judy部署參加港島補選一事「反應幾好」，稍後會正式向不同建制派政黨拜票。至於自由黨，葉太就話：「佢哋冇同我講派人出喎，佢哋淨係山頂選完後，猛咁多謝我讓咗個位出嚟，又投票（支持自由黨）喎！」
問到對Judy勝選係咪好大信心？葉太就話「好大挑戰就真」，指現時講勝算係言之尚早，但有得參選係好好嘅經驗。佢仲話唔太熟悉Judy嘅潛在對手、香港眾志嘅周庭，嚟緊都要搵吓周庭嘅資料做吓功課。
自由黨黨魁鍾國斌回應時就話，自由黨考慮派出啱啱贏咗山頂區議會補選嘅楊哲安出戰港島補選，話葉太若然冇聽聞，可以上網睇番相關訪問，仲反問：「（山頂個位）佢（葉太）讓嘅咩？」，話要同葉太「搓吓波先囉！」