荃灣區議會早前搞沙灘宣傳活動，有着比堅尼嘅女郎要同主禮嘉賓合照，但大會攝影師竟然唔肯影，搞到當事人好嬲，指大會歧視女性，仲話要向平機會投訴。
荃灣區議員鄒秉恬提出嘅沙灘「限奶令」動議噚日喺區議會上討論，但佢就話要撤銷動議，聲稱自己只係曲線諷刺區議會思想封閉，「入到沙灘着比堅尼幾咁平常嘅事，我哋唔因為係一個親子、家教會活動就自己框住自己」。
鄒秉恬即場展示大隻男着泳褲出席沙灘活動時有大批女士爭相合照嘅相片，質疑着比堅尼女士點解唔可影相。佢又話大家對性感有唔同觀點與角度，認為區議會應持開放態度，眼光唔應該太狹窄。
出席會議嘅康文署荃灣區康樂事務經理鄭國權回應指，根據條例，康文署冇權限制市民着泳裝進入沙灘；區議會副主席黃偉傑就認為，今次事件引起公眾討論係不必要嘅，似暗批鄒秉恬無事生非。