香港人平時行街，望住部電話仲多過睇路，不過呢排經過中上環，記住留意一下附近街燈，可能會有驚喜發現！旅發局同一班本土建築師合作，喺上環荷李活道一帶32支燈柱做咗啲手腳，加裝一系列舊式招牌，利用街燈光線，將17個代表舊城中環歷史嘅字樣，例如華僑日報、文武二帝及百子里等，投影喺附近建築物牆身上面。市民影相打卡之餘，仲可以scan燈柱上面嘅QR code貼紙，一scan就即刻有得重溫歷史故事，仲有其他區內實用資訊，歷史、藝術、文化及美食乜都有。舊街投影燈係期間限定，到明年1月31日㗎咋。
除咗燈柱有特色，旅發局之前仲搵埋5隻住喺中上環嘅柴犬街坊化身攝影師介紹香港，喺佢哋身上裝上攝錄機，以柴犬視角帶市民遊舊區，名副其實狗眼看中上環。