意大利足總禮拜一舉行被喻為「意甲奧斯卡」嘅周年頒獎禮，祖雲達斯門將保方獲選為2016/17球季嘅意甲最佳球員，佢同未婚妻一齊出席盛會攞獎；而祖記亦好威水，連續六年贏得最佳球隊獎項，仲有成七個現役或上季有份踢嘅球員入選意甲最佳陣容，成為頒獎禮大贏家。
39歲嘅保方仲話唔排除日後復出踢國家隊：「我去到呢個年紀，停吓係好應該，不過如果國家真係需要我，就算我60歲都會返嚟。」祖雲達斯上季喺意甲成功衞冕，除咗保方仲有六名功臣入選最佳陣容，包括丹尼爾（今季投巴黎聖日耳門）、邦路斯（今季投AC米蘭）、阿歷士辛度、比真歷、保羅戴巴拿同埋希古恩，不過後者據講話因左手有傷，禮拜五意甲惡鬥拿玻里唔使預佢！其餘四人就係拿玻里嘅高列巴尼、咸錫、梅頓斯同埋羅馬嘅尼恩高蘭，最佳教練就係由拿玻里嘅沙尼奪得。
賓尼雲圖開季14場輸晒
禮拜一意甲獨腳戲，包尾大幡賓尼雲圖作客0:1輸畀阿特蘭大，開季14場輸晒，目前已經俾尾四嘅熱拿亞拋離10分，睇嚟係真．降班膽。