立法會行管會向被取消議員資格嘅4名前議員追討合共1,174萬蚊薪津，但係4人喺差唔多9個月任內嘅投票繼續有效，惹嚟各界直斥決定荒謬，打工仔相信最有感受，有乜可能辛辛苦苦後有汗出、冇糧出？一向敢言嘅藝人黃秋生都忍唔住喺facebook爆seed，寸立會行管會好似食霸王餐，公務員事務局前局長王永平更指向4人事後追薪津係發不義之財！
王永平噚日喺報章專欄撰文話呀，明白行管會嘅法律依據，但認為向4人追薪並唔合理，因為4人履行咗憲制責任，係有貢獻，唔能夠因事後被取消議員資格而變成無償義工，奉勸立法會同政府「不要以『依法辦事』為名，做不公平、不合理的錯事」。
指政府發不義之財
至於立法會主席梁君彥話薪津屬公帑必須追討，平叔更反駁係無中生有，因當時向有履行職務嘅議員支付薪津完全合理，指事後發現可「依法」追討其實係發不義之財，「因為有關公帑是用來換取相應及有價值的公共服務，不存在有任何實際損失！」
黃秋生就喺fb寸爆留言：「老闆發達囉，可以追番啲被炒魷魚嘅員工嘅薪金。俾人炒過嗰啲仆街囉。唔知食飯得唔得呢？食到最後嗰啖，留番條菜喺碟度，然後話唔啱食，退貨，DQ。唔使畀錢，食霸王餐。」佢仲認為如果要追薪津，應該向請呢4個人返嚟嘅人追討，「等我DQ番呢十年啲租先！」
李八方