前律政司司長黃仁龍自從退下火線之後，一向少理政事，就連公職都欠奉，但特首林鄭月娥嘅班子，最近就有任務畀佢喎！特區政府宣佈新成立精神健康諮詢委員會，主席呢個位係由資深大律師黃仁龍出山擔任，負責就精神健康政策為政府提供意見，兼跟進同監察2017年《精神健康檢討報告》中建議嘅落實情況。委員會任期為兩年，除咗黃仁龍仲有醫療界、社福界同教育界等代表。
另一方面，前任行政長官及政治委任官員離職後工作諮詢委員會接納前環境局副局長陸恭蕙出任加州大學洛杉磯分校客座教授，佢將會喺該校嘅安德森商學院教授為期5星期嘅課程。委員會話佢份新工作相信唔會損害或削弱政府履行職能，亦唔會引致公眾觀感受損。