台灣聯電榮譽董事長曹興誠2000年為慶賀聯電喺紐約成功掛牌，以約4,404萬港元買下明朝「明嘉靖五彩魚藻紋蓋罐」（圖）紀念，該古董17年後重登拍賣場，備受矚目，皆因佢係早年中國瓷器世界拍賣紀錄5年霸主，最終喺佳士得香港拍賣會以1.88億港元賣出，加上佣金高達2.14億，雖然未打破紀錄，但身價已經比購入時飆升近4倍。
佳士得形容，明嘉靖五彩魚藻紋蓋罐通體以青花、紅、黃、綠等色繪傳統魚藻紋，腹部以黃彩加礬紅繪八尾鯉魚，輔以各式水草荷花；圈足內青花書「大明嘉靖年製」楷書款。
其實明嘉靖五彩魚藻紋蓋罐本來係鑑藏大家胡惠春嘅舊藏，原為一對，並兩度出現拍賣場，兩次都創下拍賣紀錄，一次係1992年12月1日喺紐約蘇富比以286萬美元成交，另一次就係曹興誠以4,404萬港元買下，創下當時中國瓷器世界拍賣紀錄。