由馬恩國擔任主席嘅中澳法學交流基金會，本月初訪京時獲全國人大常委會副秘書長李飛接見，率先講述《國歌法》核心要素，原來馬恩國此行亦獲內地當局畀足面，由專人帶路率先參觀當局為十九大翻新嘅軍事博物館，親身體驗乜嘢叫「要槍有槍，要炮有炮」，仲喺唔少國家珍藏槍炮、坦克面前拍照留念，佢都話大開眼界。
馬恩國仲透露，基金會過去訪問內地時，不時俾內地官員誤以為係來自澳洲嘅組織，令到「內交」變成「外交」事務，考慮到基金會成員已返港一段時間，所以最近喺成員一致同意下，決定明年1月1日起，將基金會改名成「香港法學交流基金會」，免俾人誤會係境外組織。
基金會最近仲完成一本講述建制派立場嘅《基本法》英文著作，當中會講述《基本法》嘅法律原則同政治爭議，全書有成30幾萬字同超過750頁，係香港較少有嘅同類型英文法律書籍。