巴甲球隊查比高恩斯慘遇空難一周年，當日機上77人只得六人生還，令查軍喪失22名球員同多名職員。歷劫後嘅查軍拒絕巴西足協獲留班三年嘅特權，重新組班後捱過季初嘅震盪期，至季尾狀態大勇近九場不敗，包括啱啱喺周日作客1:0小勝巴希亞，上到第九位，球會嘅傲氣風骨值得敬佩。
2015年離開球隊、空難後回歸嘅10號仔迪美路表示：「我哋承諾要幫球會護級，因為留係甲組先係空難英雄原來身處嘅地方。」而查比官方就表示，球會唔會為空難舉行隆重嘅紀念活動，只會開放主場館供球迷留下蠟燭鮮花致意。
倖存門將難忘傷痛
而喺空難中失去至親嘅遇難者家屬中，一年間有人曾經自殺、有人患上抑鬱，但亦有人加入查比高恩斯工作，與球會一齊重新站起。空難嘅倖存球員、事後右腳需截肢、早前已重返球場操練嘅門將科曼，直言去年嘅今日作客踢南美球會盃決賽，本應喺最快樂、創造歷史嘅時刻，突然間「燈熄咗、引擎關咗，只聽到風聲，然後開始祈禱，醒番就已經喺醫院。」要徹底忘記傷痛，似乎仍有漫長嘅路要行。