俾阿爺DQ冇得爭取連任嘅梁振英，今個聖誕節唔使好似娥特咁北上述職，更多時間專注搞佢嘅一帶一路同大灣區啦！佢噚日出席一個論壇演講時，當然又大講特講呢兩個國策，佢話一帶一路同大灣區對香港好具歷史同戰略意義，而香港嘅新定位應該係「走出去」，相信只要香港認清世界同國家發展新格局，了解兩個機遇嘅內涵，就可以為自己同國家爭取更大嘅成就。
有與會者提到，國家應該協助港青喺內地設立發展基地，CY就拋出金句：「我們香港不用去中國，因為這處已經是中國。」佢認同社會要為港青提供機會，但同時指港青都要主動同勤奮啲，而非幫佢哋包辦所有事。
高談闊論後，有記者會後問佢點解唔配合立法會有關佢收取UGL 5,000萬嘅調查，佢就封嘴唔回應咯。