皇家馬德里球星基斯坦奴朗拿度（C朗）唔使再俾人笑啦！雖然佢喺西甲暫時只係得兩個入波，但係佢家鄉就傳來好消息，事關之前整得好肉酸嘅個人銅像「升呢」，有藝術家為佢整過個新嘅，比起之前嗰個簡直好太多，睇嚟C朗會靠晒佢轉運喎！而C朗嘅宿敵美斯就慘啲，佢喺周日上演的西甲榜首大戰，上半場有個明顯入波被誤判，慘食詐糊，令巴塞隆拿作客只能以1:1逼和華倫西亞，同埋係球會今年內第二次食詐糊。
話說C朗今年三月衣錦還鄉返到馬德拉島，出席當地以佢命名嘅冠名儀式，機場度仲放咗C朗嘅銅像，真係夠晒面子。不過個銅像整到四不像咁，同C朗勁唔似樣，搞到俾唔少網民恥笑。
西班牙《世界報》報道，藝術家阿特亞加（Navarro Arteago）個仔係C朗球迷，對嗰個銅像好唔滿意，要求老竇阿特亞加用兩個星期再整一個。個銅像整好就喺11月2號進行揭幕儀式，不過當時C朗應付緊熱刺嘅歐聯分組賽，唔得閒出席。報道話新嘅銅像暫時放喺皇馬獎盃房，之後就會移去球會博物館。
美斯入波被屈冇效
C朗飲得杯落，美斯就未必啦。佢喺周日對華倫西亞嘅西甲榜首大戰入波，但係被誤判慘食詐糊。嗰個問題球出現喺30分鐘，當時美斯接應蘇亞雷斯傳球之後射門，華倫門將尼圖接波之後甩手「屙蛋」，個波再彈地入網，尼圖轉身飛撲將個波撥返出嚟。睇返慢鏡重播，個波明顯入晒白界之內，但係球證完全冇反應，美斯同旁證理論都冇結果。西甲下季先開始用視像裁判（VAR），美斯今次可謂慘食詐糊。之後下半場60分鐘華倫由洛迪高摩連奴先開紀錄，美斯喺82分鐘助攻畀佐迪艾巴射入扳平，雙方和氣收場，巴塞繼續領先第二位嘅華倫四分。
最慘嘅係今次唔係巴塞第一次食詐糊。今年一月底，巴塞喺上季西甲聯賽作客貝迪斯，佐迪艾巴射門俾對方嘅艾沙文迪護空門解圍，不過當時個波明顯已經過咗白界，最終巴塞又係1:1和波收場。
