今時今日如果你身為一個「老散」，仲連「雙馬」係乜都唔知，或者要考慮重新學過炒股喇！近年「雙馬」，即阿里巴巴創辦人馬雲同埋騰訊（700）創辦人馬化騰投資遍及中外，一時玩人工智能AI、一時玩單車，佢哋投資得嘅公司都成為行業龍頭。
呢排新股表現都可知一二，例如騰訊「親生仔」閱文（772），一上市就升成倍，加埋平安保險（2318）董事長馬明哲的「三馬概念股」眾安（6060），上市冇耐亦一度升成6成。查實雙馬仲收埋好多好嘢未上市。
好似早年大陸Call車咁，一時間十幾間公司爭住做，仲包括美國Uber都想分一杯羹，但最後留得低嘅就只有雙馬有投資嘅滴滴出行同埋快的打車，兩間公司由爭過你死我活，最後去到合併，如今成為全球第二大Startup，估值高達3,900億元都未上市。
噚日又再多一間「雙馬」Startup 誕生！被喻為內地「貨運界Uber」兩大巨頭，江蘇嘅「運滿滿」同埋貴陽嘅「貨車幫」聯合宣佈戰略合併，共同成立一間新公司，由著名天使投資人王剛做CEO，本身兩間公司嘅CEO就兼任集團聯席總裁，同埋保留原有兩個品牌繼續獨立運作。
「運滿滿」背後嘅投資者就係紅杉資本同埋馬雲旗下嘅雲峰基金，而估值已超過10億美元嘅「貨車幫」則有騰訊、百度、高瓴資本同全明星基金（All-Stars）支持。新CEO王剛來頭都唔細，充滿「雙馬」影子，曾經係阿里同埋支付寶做過管理層，重係滴滴嘅天使投資者。