獅仔行噚日喺舉行「滙豐香港社區節」，畀市民喺中環遮打道參與各式各樣體驗活動同表演。滙豐副主席兼行政總裁王冬勝喺開幕禮致辭時就話，「滙豐香港社區夥伴計劃」推行6年，今年邀請咗超過200名學生擔任社區大使，希望可以培養到佢哋服務社會嘅精神，貢獻香港。
開幕禮後，作為主人家嘅王冬勝帶同兩位嘉賓——政務司司長張建宗同香港社會服務聯會主席陳智思落去行咗一陣遮打道，仲好似對驅蚊包幾有興趣，拎咗用嚟做中草藥農耕體驗活動贈品嘅香料驅蚊包嚟聞（華華聞過，香料都幾重手）。
事實上，除咗香港之外，滙豐社區節已經拓展去到珠三角，噚日同時喺廣州舉行開幕禮，唔知滙豐遲啲會唔會越做越大去埋歐美搞社區節呢？