奧立仕（860）之前獲「超人」李嘉誠同澳門前特首何厚鏵個仔何敬民睇中入股，噚日集團就公佈，為重整架構，決定委任一班有豐富電動車業務經驗嘅董事管理，所以搵咗何敬民堂兄何敬豐擔大旗，由執行董事兼聯席主席一職，調任為董事會主席。
今年40歲嘅何敬豐畢業於於澳洲新南威爾士大學，主修財務及法律學士，佢曾經喺17年前做過大摩分析員，而喺投行、資本市場同法律界都甚有工作經驗，今次升做主席一職，何生年薪達120萬港元。
至於原先係大股東嘅張金兵，就會調任為聯席主席兼非執行董事，而上月先履新嘅首席執行官兼執董何志傑，同埋電動車技術公司GLM行政總裁小間裕康就被委任為執行董事，二人年薪分別為480萬港元及1,760萬日圓（折合約123.22萬港元）。