喺公園見到別出心栽嘅園藝，心情都會豁然開朗，而負責打理花花草草，唔一定係上咗年紀㗎！勞工處展翅青見計劃同海洋公園及另一培訓機構合辦「園藝見習生培訓計劃」，現年23歲嘅90後鍾慧雪，自細熱愛大自然，對園藝好有興趣，結果將興趣變為工作，喺香港知專設計學院修畢園境建築高級文憑後，年初參加上述計劃，接受12.5天免費職前培訓後獲海洋公園聘用。
見客人selfie獲滿足感
阿雪日常負責修剪樹木，又喺導師指導下學習用二呎剪、手剪等工具，塑造並保養樹木形態，同時會利用回收物料製作藝術裝置，佢接受政府新聞網訪問時話，只要花啲心思，普通車胎都可以變成靚天鵝。見到樹雕造型同園藝設計令客人笑住selfie，非常有滿足感。
海洋公園現有主要樹雕造型約22個，設計上都希望配合園區主題，例如熊貓館以竹為主，樹熊館就種植桉樹；園內大部份樹木由園林部約60名員工保養，海洋公園高級園林經理鄭美勤有30年園藝經驗，佢希望計劃可吸引更多年輕人入行。