禮賓府噚日開放畀市民參觀，係特首林鄭月娥上場同裝修之後第一次開放，吸引唔少市民入場。市民除咗可以參觀特首平時舉行官方活動同接待賓客嘅地方之外，仲可以同超過40種花卉樹木影相留念。現場仲有中學樂團表演同導賞員介紹禮賓府嘅建築特色，林鄭亦喺facebook整咗個Q版公仔介紹打卡位，噚日仲亮相同市民selfie。
68歲嘅司徒婆婆同丈夫本來唔知噚日係禮賓府開放日，二人咁啱行過禮賓府，俾樂聲吸引到而入去參觀。司徒婆婆話佢上一次嚟已經係30年前，當時仲係英治時期嘅總督府。婆婆話：「（發現呢度）比我想像中大好多，好靚。」當問到對林鄭政府有咩期望，佢就話：「希望佢可以落實到講過嘅嘢啦，畀我哋安居樂業，我哋都係想安安樂樂過日子之嘛。」
林太同8歲嘅仔仔專登8點幾就起身，由沙田嚟禮賓府參觀，林太覺得禮賓府一年開一次，機會難得，希望帶仔仔嚟認識吓歷史建築。
有市民讚靚女
林鄭月娥下晝喺禮賓府嘅花園出現，同市民握手合照，唔少市民都表現得好興奮。其間有市民同佢講「祝福你」同「加油」，又有市民讚林鄭「靚女」。不過亦有小朋友唔知係人多定俾林鄭嚇親，同林鄭握手嘅時候大喊，林鄭就拍吓佢膊頭，拖住佢手仔，以示關心咁話。林鄭月娥留咗大約半個鐘就上樓。
而林鄭喺fb嘅Q版造型，仲有全城驚嘆嘅黑絲look，唔通佢對呢身打扮都好滿意？
李八方
