練馬師大摩今季請咗澳洲名將貝湯美做主帥，暫時成績唔算太突出，上周日（19日）以「明月千里」捧走馬會盃二級賽，算係二人代表作。
今午（26日）再戰沙田日馬，摩、貝同樣繼續贏馬，但分開發展，大摩頭場以華人騎師蔡明紹爆大冷贏「有禮」，貝湯美則憑蘇保羅馬房「白鷺飛翔」爆冷攻下第四場四班1400米；「白鷺飛翔」換人連捷，單Win及組合獨贏A3分別派251.5及20.5元。
四歲馬「白鷺飛翔」上仗用貝湯美鄉里祈普敦，當時係5.8倍熱門建功。呢次改由貝湯美操刀，繼續跑四班1400米，排檔由上次第1檔轉為今場11檔，早段留在極後位置，於最後百幾米從外叠後上，冚過晒所有對手，輕鬆贏0.75馬位取得連捷，亦成為貝湯美季內五Win中，首匹非摩廐頭馬。
值得一提「白鷺飛翔」其中一位白髮外籍長者馬主團體成員非常激動，愛駒衝線時他緊握雙拳大聲歡呼，之後又雙手夾住蘇保羅面頰，親吻他一大啖，熱情到爆，莫非25倍Win收穫不少？
第四場幾乎俾外檔馬包辦前四名，當中14檔「好友益」由李寶利跑第二，4檔「及時行樂」得第三，9檔「再創商機」獲殿軍，四重彩派近70萬元。