喺中大讀過書嘅朋友，都有唔少等校巴、逼校巴嘅回憶，剛過去嘅星期六係中大一年一度校友日，校方以校巴做主題，搞咗個「迫巴士大挑戰活動」籌款，邀請校友分男女兩組逼巴士，每上一個就有3位校友捐助人捐出500蚊，結果兩輪挑戰共有170人成功逼上巴士，共為中大籌得15萬元捐款。
當日有超過5,000位中大校友同親屬參與，而將於今年12月底卸任嘅中大校長沈祖堯歡迎校友從世界各地重臨母校，其後從中大校友日畢業紀念班籌款委員會成員手中，接過捐贈予「香港中文大學校友傳承基金」嘅108萬元支票。中大話，連同這筆捐款，基金累積籌得超過500萬元。