尊師重道呢個問題，近年好值得人反思。港鐵主席馬時亨近日憶起當年喺港大讀書時候，好鍾意上陳坤耀教授嘅堂，佢話自己雖然成日走堂，但從來都唔走陳教授嘅堂，因為覺得陳教授教書深入淺出，起碼令佢聽得明喎。
陳教授就話當年同學好乖，上堂留心聽書，就算走堂都會問准佢。話說有次成班同學因為釣魚台事件去校園嘅荷花池抗議，派咗梁錦松做代表，向佢請假。佢記得當時阿松同佢講：「老師，我哋今日要靜坐抗議，可否放我哋一堂？」經過佢嘅批准，班同學先去抗議。陳教授笑住話：「我當時就諗，佢哋去靜坐咪靜坐，唔返咪唔返，唔知點解要派個人同我講。」 肥馬自爆當時有份走堂去抗議，由阿松做代表代向陳教授講，呢啲就喺尊重老師嘅表現，感慨話：「好可惜，𠵱家應該冇呢支歌仔唱！」