財爺陳茂波網誌透露，上星期同幾位財金高官去北京面聖，搵相關內地政府部門傾偈，仲post咗張合照。
同劉怡翔首次出席
查實每逢年尾時間，財爺都會聯同金管局、財庫局阿頭一齊上京，舊年個組合就係曾俊華、陳家強、陳德霖，屬於一年一度恒常安排，今年得番陳總係熟口熟面，波叔同埋財庫局局長劉怡翔都係首次以新身份去。
波叔網誌冇講太多詳情，只係話拜會多個包括負責金融工作嘅中央部委。波叔都有話，今次證監會主席唐家成都有同行，但點解張相冇咗唐主席呢，唔通靜雞雞同中證監傾密偈？例如下年推出嘅股票實名制安排？
另外，波叔網誌提醒大家注意股樓風險，唔單止話可能有黑天鵝，仲可能有「灰犀牛」，究竟乜嘢係灰犀牛呢？咪係話大家明明睇到，但又低估咗嘅風險囉，唔知佢講緊邊瓣嘞，不過中長期實會中到一瓣嘅。
不過話時話，陳德霖年尾都真係好唔得閒，去完呢個trip之後，下月中又會帶銀行公會飛北京與上海。
李華華
mailto:[email protected]