練馬師葉楚航這天(25日)在沙田馬場晨課有異動，向來較少在馬房閘口等馬操回來的他，這天一早企定定準備睇馬，原來為了睇「好客本色」，即時向鞍上助手問了幾句，希望了解此駒的最新進度，非常緊張，可以話有晒搏殺手影。
「好客本色」列陣周日(26日)沙田第十場三班1400米，這匹四歲質新馬仍未開齋，但今季明顯有進步，上仗1000米直路賽配柏寶，後上凌厲得亞軍，只不敵從未輸過的超班灰馬「旺蝦王」，拼後柏寶霸住親跳多課，驚死被人搶走隻馬咁。今次「好客本色」大幅增程初跑1400米，表面無根據，但牠外地於1300米表列賽得亞軍，並非冇長力。
「好客本色」最強對手當然是蔡約翰馬房新勝的「以奇用兵」，但「好客本色」作戰經驗較多，負120磅只需讓同齡的「以奇用兵」4磅，未算太吃虧之餘，「以奇用兵」初上三班壓力大增，既然「好客本色」取勝機會在眼前，又難怪葉楚航今朝咁緊張了。