利物浦係英國球壇一支歷史悠久嘅球隊，1892年成立嘅佢哋，今年已經係成立125年。講到利物浦嘅會徽，當中最重要嘅元素就一定係隻雀，佢並唔係一隻普通嘅雀，佢個名叫LIVER BIRD，本來就係利物浦市嘅象徵，市內唔少地方同建築物都會見到。
喺最初期，利物浦嘅會徽上面係有兩隻LIVER BIRD㗎，到咗50年代先開始簡化做一隻雀。一個可能比較多人留意到嘅，利物浦會徽好多時都係畫喺一塊外型好似盾牌嘅牌上面，到咗1992/93球季，為咗紀念利物浦創會100周年，會徽上面加入咗晏菲路非常出名嘅辛奇利大閘，亦即係SHANKLY GATES，同時會歌YOU”LL NEVER WALK ALONE，亦都加咗入會徽。百周年之後，利物浦嘅會徽再作出咗輕微改動，會徽底部寫明球會嘅創會年份，亦都加入咗兩個火把，要嚟紀念96位喺希斯堡慘劇往生嘅球迷。