人稱「桶豪」嘅公民黨立法會議員譚文豪Jeremy，自從當選議員之後發脹唔少，噚日立法會財委會上佢就自爆減肥成功，3個月腰圍減咗兩吋、少咗7磅肥肉，誇張到連度身訂做嘅西裝都要拎去修改，終於搣甩桶豪稱號！講到有咩減肥妙計，Jeremy就話3個月前聽朋友建議，完全戒飲高糖飲品之後就成功瘦身。
Jeremy話，當選議員之後成日要同團體、市民見面，少不免都會叫杯飲品，不知不覺就吸入咗好多糖份，而過去3個月，佢聽朋友建議停飲紙包飲品同走甜，3個月就收身成功。佢話想用自己成功例子，證明目前飲品糖份過多，建議政府立例要求標籤高糖飲品，等消費者可按標籤選擇。