英國《BBC》禮拜四報道，試過100次代表巴西國家隊，曾效力皇家馬德里同AC米蘭嘅前鋒羅賓奴，被指喺四年前意大利米蘭一間disco，連埋另外五個男人輪姦一名22歲阿爾巴尼亞女人罪成，被判入獄九年，不過據報根據巴西引渡條例，羅賓奴只要呢世唔出國，就唔使去受刑，或者羅賓奴都可以試吓搵舊老闆A米前班主兼意大利前總理貝魯斯科尼幫手，話唔定有得傾。
現年33歲嘅羅賓奴，𠵱家踢緊巴甲明尼路，佢就當然冇去到米蘭出庭應訊，而且一直否認控罪，同案另外五個男人同樣罪成，但未知佢哋要坐幾耐。
唔出國就唔使受
意大利報章《Corriere della Sera》報道，受害人係一個當時22歲嘅阿爾巴尼亞女人，佢喺disco俾人灌醉後不省人事，當然冇力反抗。羅賓奴同另外五個男人就喺佢唔清醒嘅情況下將人輪姦。
被判監九年嘅羅賓奴，據報有權就刑期提出兩次上訴，喺上訴過程完結前都未使坐監。英國《電訊報》引述一個法律人士話，上訴過程完晒後，意大利先會聯絡巴西當局，展開引渡程序。不過，巴西憲法講明任何國民都不得被引渡去其他國家，所以羅賓奴只會喺離開巴西去其他國家嘅情況下，先至有機會被捕。另外，法庭亦都判受害人可獲得六萬歐元（約55萬港元）賠償。
喺A米踢得最穩定
羅賓奴職業生涯最光輝係2005年21歲加盟皇家馬德里，同朗拿度、施丹做隊友，而佢喺2008年加盟曼城，成為曼城得到阿聯酋資金入主後嘅第一單重磅交易，曼城仲要係最後一刻截車路士糊，當時都相當轟動，而且佢仲係巴西隊2010世盃嘅大將，大家都期待佢同卡卡可以擔起半邊天。
不過羅賓奴踢咗一季半就被送走，2010至2014年間效力AC米蘭，係佢喺歐洲踢得最穩定嘅一隊，但當時星味已經差得多。去到2014至15球季，羅賓奴就已經被送返山度士，然後短暫踢過廣州恒大，中超都踢得10場就被送走返去明尼路，簡直係典型小時了了嘅人辦，𠵱家仲衰埋強姦，呢鋪睇吓羅賓奴會點算喇，使唔使搵喺意大利仲相當有影響力嘅前老闆貝老幫吓手？
