早排因為政府要起社區農圃，引起區內居民抗議嘅西環碼頭海濱長廊，噚日舉行香港歷來最大規模嘅道教羅天大醮暨中華文化展，仲請埋內地宗教事務局局長王作安同特首林鄭月娥主禮。
籲集愛國道教力量
雖然呢個係宗教文化活動，但喺今時今日嘅中國國情下，點可以唔政治正確，提中共黨總書記、國家主席習近平同佢份十九大工作報告，所以就算道教搞羅天大醮，亦唔可以唔提習講話。
今次羅天大醮規模十分大，除咗王作安同林鄭，亦請咗中國道教協會會長李光富出席，王作安同李光富身為內地宗教官員，致辭時就算講宗教嘢都好，唔提習近平嘅十九大講話又點可以叫政治正確？
所以佢兩個特別提及習十九大講話入面，要全面貫徹一國兩制方針，支持香港維護國家發展大局部份，王作安仲叫主辦單位香港道教聯合會，要凝聚愛國、愛港、愛教嘅道教力量，強化國家意識，支持特區政府依法施政。
至於林鄭月娥致辭就冇提習講話同十九大工作報告，亦冇提政治嘢，只係講個活動同道教文化，本身係天主教徒嘅林鄭，亦冇參加拜神，只負責主持鳴鑼儀式。八方記得當年身為基督教徒嘅前民政事務局局長何志平，當年代表香港人去車公廟求籤，俾好多人批評身為教徒唔應該咁做，今次林鄭唔拜神，應該可以避開爭拗喇。
李八方