自從上年立法會選舉後，皇上黃洋達同教主黃毓民反面，熱血同普羅政治學院兩派支持者不斷互片，已經煩到冇乜人關心。
但係皇上唔知係咪想搞吓話題、谷吓佢個萬人台點擊率，佢最近喺facebook上載一段由教主發嘅短訊，短訊係教主收到恐嚇信，咬定同皇上有關。
不過，皇上就話不知恐嚇信從何而來，又叫教主唔好再鬧佢兩公婆，之後仲話佢已代埋教主去報案，希望盡快搵出犯人。
之但係，教主似乎對皇上挑機冇反應，反而之後普羅政治學院出份聲明，反駁有人話佢哋拖欠熱血2017年擺年宵攤位條數，究竟皇上同教主仲會互片幾耐？而佢哋會唔會互爆對方更多嘢？呢啲先係花生友最關心。